ОВДЕ УЧЕШЕ ТАТКО МИ – СЕГА УЧАМ ЈАС. УТРЕ ЌЕ УЧАТ МОИТЕ ДЕЦА. ОВА Е НАШ ДОМ
Традицијата за соработка со Е-Твининг проекти продолжува.
Ученици од VII одд. и оваа учебна година 2024/25 (второ полугодие), зедоа активно учество во проектот „Културни и природни истражувачи“ заедно со наставничката по англиски јазик Елисабета Настоска.
Во текот на месец мај 2025 година ООУ „Ванчо Николески”– с. Лескоец, општина Охрид реализираше работилници во соработка со партнер училиштето ООУ „Јунус Емре” – с. Лисичани, општина Пласница. Работилниците се реализираа во две возвратни посети на партнер училиштата. Првата средба се реализираше на 08-ми Мај во централното училиште во село Лескоец. Втората средба се реализира на 14-ти Мај, а домаќин беше училиштето „Јунус Емре” од село Лисичани, општина Пласница. Работилниците се реализираа во рамки на Проектот за меѓуетничка интеграција во образованието. Во работилниците учествуваа вкупно 13 наставници и 52 ученици од двете партнер училишта.
Во периодот од 31-ви Март до 4-ти Април, нашето училиште беше домаќин на педагогот Сања Матиќ и наставничката во одделенска настава Анита Чупиќ од ОШ „Краљица Јелена“ од Солин, близу Сплит, Република Хрватска. Тие беа на работна посета во нашето училиште, како дел од програмата за акредитација Еразмус+.
По повoд 45 годишнината од смртта на познатиот македонски писател и наш патрон Ванчо Николески, преставници од НУ Библиотека „Григор Прличев“ од Охрид гостуваше во нашето училиште.
Нашите ученици од второ и трето одделение од Лескоец настапија на предновогодишниот хуманитарен настан „Новогодишен сон“, во организација на Црвен Крст Охрид и Општина Охрид.
Исто така училиштето имаше штанд со изработени новогодишни украси, со чија продажба учествувавме во собирање средства за разубавување на новогодишните празници на социјално загрозените семејства во Охрид.
Во рамките на проектот „Нашите приказни се наши мостови“ на 05.11.2024 година се реализира четвртата и последна виртуелна (онлајн) активност од овој проект. На истата учествуваа над 70 наставници и ученици од трите земји учеснички во проектот (Македонија, Хрватска и Словенија).
Во рамки на третата и последна образовна мобилност од Еразмус+ проектот „Нашите приказни се наши мостови“ во Охрид, учениците учесници ја изготвија третата Е-книга „Приказни од Охрид“, која во себе содржи приказни што беа раскажани на самата мобилност.
Преку приказните раскажани и доживеани на сите образовни мобилности од овој проект, се изградија мостови на пријателство и почитување помеѓу народите и културите на земјите учеснички од проектот.
Учениците кои учествуваа на Еразмус+ образовната мобилност во Охрид во рамки на проектот „Нашите приказни се наши мостови“/”Our stories are our bridges” (Андреа Базгалоска, Ана Ставреска, Дејан Ванѓелофски, Тамара Зенгоска, Ева Ѓузелоска од осмо одделение, како и Иво Коталески од деветто одделение), направија дисеминација на своите впечатоци, искуства и знаења пред нивните соученици.
Секој од нив беше импресиониран од богатството на организираните активности што заедно ги реализиравме во рамки на проектот, од посетените места и институции, како и од приказните слушнати и пренесени од страна на сите вклучени во Еразмус+ програмата.
Со помош на машината за ласерско гравирање што нашето училиште ја набави преку проект со Здружението “Macedonia Schools Project”, секцијата 3Д под менторство на наставникот по информатика Горан Матески, изготви макета на охридска куќа.
Се реализираше интерактивна работилница во која секој учесник во образовната мобилност на Еразмус+ проектот “Нашите приказни се наши мостови” создаде своја макета на охридска куќа.
Со вакви средства и активности се обидуваме да поврзуваме теорија со пракса, да го ставаме знаењето во активна форма, да поттикнуваме креативност кај нашите ученици, како и да ја промовираме нашата култура и наследство.
Училиштето беше посетено од претставник на Здружението “Проект за македонските училишта” од САД, г-дин Том Линехам.
ООУ "Ванчо Николески" Лескоец, Охрид 